Савол: Турмуш ўртоғимнинг касби чўпон бўлганлиги сабабли биз кўпинча аҳоли пунктидан узоқ жойларда бўлган чўл зоналарида яшаганмиз. Биргаликдаги турмушимиздан 1 нафар фарзандимиз бор. Мен бу фарзандимни туғруқхонада эмас, чўл зонасидаги чўпон ўтовида туққанман. Ҳозирга қадар боламга туғилганлик гувоҳномасини олмаганмиз.
Ушбу фарзандимни туғилганлик ҳақидаги гувоҳномасини олиш учун мен қаерга ва қандай тартибда мурожаат қилишим керак?
Г.Йўлдошева, Вобкент туман
Жавоб: Ўзбекистон Республикаси адлия вазирининг 2013 йил 31 декабрдаги 400-мҳ-сонли буйруғи билан тасдиқланган “Фуқаролик ҳолати далолатномаларини ёзиш органларида иш юритиш тартиби тўғрисида”ги Йўриқноманинг III-боб 48-49-бандларида “Туғруқхонадан ташқари жойларда ва тиббий ёрдамсиз туғилган боланинг туғилишини қайд этиш унинг шу онадан туғилганлигига гувоҳлик берувчилар имзолаган ва ҳудуд шифокори ёки фельдшерининг имзоси билан тасдиқланган далолатнома асосида амалга оширилиши, туғруқхонадан ташқари жойларда ва тиббий ёрдамсиз туғилган боланинг туғилганлигини тасдиқловчи далолатнома тузилмаган ва туғилишни қайд этиш учун етарли асослар мавжуд бўлмаган тақдирда, боланинг у ёки бу онадан туғилганлик фактини аниқлаш қонун ҳужжатларига мувофиқ суд томонидан амалга оширилиши белгиланган. Ушбу қоидалар талабидан келиб чиқиб, фарзандингизга туғилганлик ҳақидаги гувоҳнома олиш учун юқорида кўрсатилган гувоҳлик берувчилар имзолаган ва ҳудуд шифокори ёки фельдшернинг имзоси билан тасдиқланган далолатнома тузилмаган бўлса, сиз ўзингиз яшаб турган ҳудуддаги фуқаролик ишлари бўйича судга ариза билан мурожаат қилишингиз лозим. Суд ишни кўриб чиқиб фарзандингизни сиздан туғилганлик фактини тасдиқловчи ҳал қилув қарори чиқариб бергач, ушбу қарор билан бирга сиз ва турмуш ўртоғингиз шахсингизни тасдиқловчи ҳужжатларни ФҲДЁ бўлимига тақдим қилишингиз лозим бўлади. ФҲДЁ бўлими томонидан сизнинг мурожаатингиз кўриб чиқилиб, фарзандингизга туғилганлик ҳақидаги гувоҳнома расмийлаштириб берилади.
Савол: Яқинда турмуш ўртоғим гиёҳвандлик воситаларини қонунга ҳилоф равишда сотганлиги аниқланиб, ушбу жиноятни содир қилгани учун судланиб, 7 йил муддатга озодликдан маҳрум қилинди. У билан биргаликда яшаган давримизда ҳам турмушимиз яхши бўлмаган. У мен билан арзимаган сабабларга кўра жанжаллашиб юрар эди. Эндиликда мен у билан ажрашмоқчиман, ажрим учун судга мурожаат қиламанми, бу учун қандай ҳужжатларни тақдим қилишим керак?
Н.Жўраева, Вобкент туман
Жавоб: Ўзбекистон Республикаси адлия вазирининг 2013 йил 31 декабрдаги 400-мҳ-сонли буйруғи билан тасдиқланган “Фуқаролик ҳолати далолатномаларини ёзиш органларида иш юритиш тартиби тўғрисида”ги Йўриқноманинг V-боб 108-бандида Содир қилган жинояти учун уч йилдан кам бўлмаган муддатга озодликдан маҳрум қилинган эр билан никоҳдан ажралишни қайд этиш учун хотин маҳкумнинг жазони ўтаётган жойи кўрсатилган ва суднинг қонуний кучга кирган ҳукмининг нусхаси илова қилинган ҳолда ариза билан мурожаат қилиши лозим.
Мазкур бандда назарда тутилган ариза мурожаат этган шахснинг доимий яшаш жойидаги ФҲДЁ органига берилиши, озодликдан маҳрум қилинган эр билан никоҳдан ажралишни қайд этиш ҳақидаги аризани қабул қилган ФҲДЁ органи маҳкумни хабардор қилиш ҳамда унинг розилигини аниқлаш учун шу куннинг ўзида тегишли жазони ижро этиш муассасасига хабарнома юбориши, бунда никоҳдан ажралишни қайд этиш маҳкумнинг розилик хати олингандан кейин амалга оширилиши, маҳкум никоҳдан ажралишни қайд этишга рози бўлмаган тақдирда, ФҲДЁ органи ариза берувчига никоҳдан ажралишни қайд этиш суд томонидан амалга оширилиши ҳақида асослантирилган хулоса тақдим этиши белгиланган.
Юқоридагиларга асосан сиз турмуш ўртоғингизни судланганлиги ҳақидаги суднинг қонуний кучга кирган ҳукми нусхасини илова қилган ҳолда ўзингиз яшаб турган ҳудуддаги ФҲДЁ органига ариза билан мурожаат қилишингиз лозим бўлади.
Саволларга Вобкент туман ФҲДЁ бўлими мудири Н.Жаҳонов жавоб берди.