Маҳаллий давлат ҳокимияти органларининг норма ижодкорлиги соҳасидаги фаолиятини янада ривожлантириш учун, ушбу йўналишдаги мавжуд қонунчилик базасини янада такомиллаштириш ва ривожлантиришни даврнинг ўзи тақозо этмоқда. Ўз навбатида, маҳаллий давлат ҳокимияти органларининг норматив-ҳуқуқий ҳужжатлари Ўзбекистон Республикаси қонунчилигининг ажралмас бўлаги сифатида ижтимоий муносабатларни тартибга солишда алоҳида аҳамият касб этади.

Ўзбекистон Республикаси Конституциясининг 104-моддаси, “Маҳаллий давлат ҳокимияти тўғрисида”ги Ўзбекистон Республикаси Қонунининг 6-моддаси ҳамда “Норматив-ҳуқуқий ҳужжатлар тўғрисида”ги Ўзбекистон Республикаси Қонунининг 14-моддасига мувофиқ, маҳаллий давлат ҳокимияти органлари ўз ваколатлари доирасида тегишли ҳудуддаги барча корхоналар, муассасалар, ташкилотлар, бирлашмалар, шунингдек мансабдор шахслар ва фуқаролар томонидан бажарилиши мажбурий бўлган қарорлар шаклида норматив-ҳуқуқий ҳужжатлар қабул қилиши мумкинлиги мустаҳкамланган.

Таъкидлаш лозимки, “Норматив-ҳуқуқий ҳужжатлар тўғрисида”ги Қонуннинг 21-моддасида норматив-ҳуқуқий ҳужжатларнинг лойиҳалари ҳуқуқий экспертизадан ўтказилиши шартлиги белгиланган. Мазкур Қонуннинг 22-моддасига мувофиқ маҳаллий давлат ҳокимияти органлари қарорлари лойиҳаларининг ҳуқуқий экспертизаси Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари томонидан амалга оширилади.

Бошқарма томонидан маҳаллий давлат ҳокимияти органларининг жами 424 та норматив ҳуқуқий ҳужжатлари давлат ҳисобига олинган бўлиб, шундан 95 таси ҳисобот даврида давлат ҳисобига олинди.

Шунингдек, адлия бошқармаси томонидан 2015 йил II -ярим йиллик иш режасига асосан жами 9 та маҳаллий давлат ҳокимияти органларининг норма ижодкорлиги фаолияти ўрганилди.

Ўрганиш натижалари юзасидан 39 та туркумлаш фаолиятида, 88 та юридик хизмат фаолиятида, 151 та норма ижодкорлиги соҳасида камчиликлар, шунингдек, 41 та ноқонуний қарорлар қабул қилганлик ҳолатлари аниқланди.

Ж.Камолов, Бухоро вилоят адлия бошқармаси масъул ходими