Қучоғи гулларга тўлган аёл
Дата: 24.11.2015
Инсон ҳаётда бир марта яшайди. Агар одамзод дунёда икки марта яшаганида эди у донишмандона умр кечирган бўларди. Чунки олдинги яшаган ҳаётидан олган сабоқлари унга шундай умргузаронликни тортиқ қилиши турган гап. Афсуски, умр бир марта берилади. Ана шу умри давомида оқил инсонлар ўзидан яхши ном қолдиради: одобли фарзандлар, зукко шогирдлар, гўзал боғ-роғлар, умрбоқий китоблар ва яхши сўзлар умри безагига айланади. Бир сўз билан айтганда, яхши инсон умрбўйи хизмат қилган соҳасида ўз тажриба мактабини яратади. Шогирдлари уни кўрганда “фалончи опанинг ёки фалончи аканинг мактабини ўтаганмиз”, дейди. Тамара Тиллаева ҳуқуқшунослик соҳасида ана шундай ўзига хос тажрибага эга инсон.
1972-1977 йиллари Тошкент давлат университети (ҳозирги ЎзМУ) талабаси бўлди. Сўнг илк фаолиятини 1977 йил Ўзбекистон Республикаси Олий судининг катта консультантлик вазифасида бошлаган бу инсон катта ҳаёт йўлини босиб ўтди. У ўз умрини гулларга буркаб, фарзандлари камолини кўриб, шогирдлар ютуғидан ғурурланиб эл назаридан қолмай яшамоқда. Аслида инсон учун бунинг ўзи бахт.
1990 йил Тамара Тиллаевага ишонч билдирилиб, Мирзо Улуғбек туман судининг судьяси вазифасига, сўнг туман суди раисининг ўринбосари, кейин эса шу туман судининг раиси лавозимига тайинланган.
Тамара опанинг катта салоҳияти, сермулоҳазалиги ва касбга бўлган садоқати соҳада самарали хизмат қилишга замин яратди.
— Тамара опанинг гўзал хислатлари кўп дейди, — у кишининг шогирдларидан бири Ангрен шаҳар 2-сон ФҲДЁ бўлими мудираси Умида Эргашева. — Устозимиз яхши ҳуқуқшунос бўлиб қолмай санъат ва адабиётнинг ҳам шайдоси. Опа ана шундай фазилатлари билан ҳам ҳар қандай санъаткор ва ёзувчи билан соатлаб суҳбатлашиши мумкин.
Яқинда Адлия вазирлиги жамоаси Тамара Тиллаевани қутлуғ ёши билан табриклаб шундай дея табрик йўллади:
“Ҳуқуқшунослар ва ҳамкасбларингизнинг камтар ҳамда талабчан раҳбар, устозларингизнинг сермулоҳазали, изланувчан шогирд сифатида таърифлашларида ҳам бевосита юртни севиш, касбни ардоқлашга бўлган меҳнатингиз намоён бўлади.
Бугун меҳнатингиз қадрланган ва эътироф этилган дамда қутлуғ ёшингиз билан яна бир бор табриклар эканмиз, Сизга мустаҳкам соғлиқ, узоқ умр, хонадонингизга файзу барака тилаймиз”.
Биз ҳам ана шу тилакларга қўшиламиз. Қучоғингиз доимо гулларга тўлиб, фарзандлар, неваралар ва шогирдлар ардоғида бўлинг, деймиз.
Эрмуҳаммад Шерматов, Адлия вазирлиги Фахрийлар кенгаши раиси