1985 йил 17 декабрь куни БМТ Бош Ассамблеясининг 40-сессиясида қабул қилинган резолюцияга биноан 5 декабрь - Халқаро волонтёрлар куни деб эълон қилинган ва ушбу кунни кенг нишонлаш орқали ижтимоий ва иқтисодий ривожланиш йўлида кўнгилли равишда иш бошлаган волонтёрлар хизматини қўллаб-қувватлаш, уларнинг сафини кенгайтиришга кўмаклашиш мақсад қилинган.
Мамлакатимизда 2019 йил 2 декабрда Ўзбекистон Республикасининг “Волонтёрлик фаолияти тўғрисида”ги Қонуни қабул қилинган бўлиб, унинг амалда самарали ишлаш механизмини янада такомиллаштириш, соҳалар, йўналишлар бўйича кўнгилли-волонтёр гуруҳларини ташкил этиш, малака ва салоҳиятига қараб волонтёрларни даражаларга ажратиш, уларни рағбатлантириш ва самарали ишлашини таъминлаш муҳим аҳамиятга эга.
Қонунга мувофиқ, волонтёрлик фаолияти – жисмоний ва (ёки) юридик шахсларнинг манфаатларини кўзлаб бепул асосда амалга ошириладиган, жамоат учун фойдали бўлган ихтиёрий фаолият ҳисобланади.
Волонтёрлик фаолияти қуйидаги шаклларда амалга оширилиши мумкин:
- якка тартибдаги волонтёрлик фаолияти;
- волонтёрлар гуруҳи таркибидаги волонтёрлик фаолияти;
- волонтёрлик ташкилоти орқали волонтёрлик фаолияти.
18 ёшга тўлган жисмоний шахслар волонтёрлик фаолиятини амалга ошириши мумкин. Волонтёрлик волонтёр ва волонтёрлик фаолиятининг ташкилотчиси ўртасида ёзма шаклда тузилган шартнома асосида амалга оширилиши мумкин.
Волонтёрлик фаолиятининг ташкилотчиси, агар у волонтёрлик фаолияти билан ойига 20 соатдан кўпроқ банд бўлса, волонтёр билан волонтёрлик шартномасини тузиши шарт.
Волонтёрлик фаолиятининг ташкилотчиси волонтёрга махсус кийим-бош беради ҳамда волонтёрлик акцияси ўтказилаётган жойга келиб кетиши учун йўл ҳақи, яшаш, овқатланиш ва бошқа харажатларининг ўрнини қоплайди.
Маълумот ўрнида таъкидлаб ўтиш лозимки, 2020 йилда дунёнинг турли мамлакатларида коронавирус пандемиясига қарши курашиш, карантин шароитида кекса ёшдаги, имконияти чекланган ва эҳтиёжманд кишиларга ёрдамлашишда волонтёрларнинг хизмати катта бўлмоқда. Шу боис, жорий йилда бу сана “Волонтёрлар сафига қўшилинг!” шиори остида ўтмоқда.