Давлатимиз мустақилликка эришгандан кейин, Президентимиз олиб бораётган оқилона сиёсатнинг маҳсули ўлароқ, юртимизда тинчлик ва осойишталик ҳукм сурмоқда. Мустақиллик бизга эрк ва ҳурриятни тақдим этиб, ўзлигимиз, шон-шуҳратимиз, миллий қадриятларимизни қайтариб берди. Ўз тақдиримизни ўзимиз белгилаш ҳуқуқидек юксак бахтга эга бўлдик. Айниқса, бой тарихимиз, илмий-маданий меросимиз, дину диёнатимиз, қадимий урф-одат ва анъаналаримиз қайта тикланиб, янгича мазмун-моҳият касб этди. Эндиликда меҳр-оқибат, ҳамжиҳатлик, бағрикенглик, ўзаро ҳурмат ва иззат каби чин инсоний фазилатлар, миллий ва умумбашарий қадриятларга ҳамоҳанг тарзда яшаш ҳаётимизнинг қоидасига айланиб улгурди.
Мустақил давлатда инсон орзу-умидини амалга ошириши учун энг катта таянч тинчлик ва осойишталикнинг таъминланишидир. Тинчлик сўзи кишини безовта қилмасликни, ҳолатларнинг тинч ва осойишта кечишини англатади. Оилада тинчлик ва осойишталик ҳукм сурса, оила бардавом ва мустаҳкам бўлади, мамлакат, юрт тараққиёти, фаровонлиги таъминланади, инсоннинг ҳуқуқ ва эркинликлари кафолатланади. Халқимиз тинчлик ва осойишталикни истаб кундалик ҳаётида қатор қилаётган эзгу амаллари, мазкур йўлдан қатъий ва оғишмай олға интилаётгани ҳар бир ишда ўзини намоён қилади. Кексаларимиз дуо қилса, Яратгандан хонадонларимизни тинч, юртимизни обод қилгин деб юзига фотиҳа тортади.
Бир сўз билан айтганда, инсониятга, ҳаводек зарур бўлган тинчлик-хотиржамлик, осойишталикдан ҳам зиёда, мўътабар неъмат йўқ. Статистик маълумотлардан аниқланишича, нотинчлик, уруш сабабидан охирги беш минг йилда уч миллиарддан зиёд одам ҳаётдан кўз юмган. Урушлар сабабидан меҳр-оқибат, инсонийлик унутилади, ҳар қандай эзгу амаллар, улуғ мақсадлар поёнига етмайди. Ер қанчалик кенг бўлиши билан шунчалар тор ва зиқ кўринишга мубтало бўлади. Демак, хотиржамлик, осойишталик неъматини сўрашда доно халқимиз нечоғлик тўғри ва гўзал йўл танлаган. Жаннатмакон юртимизда тинчлик-осойишталик барқарорлигини таъминлаш йўлида давлатимиз томонидан катта иш олиб борилаётгани бизнинг бахтимиздир. Дарҳақиқат, мустақиллик йилларида мамлакатимизда қадимий илдизга эга бўлган миллий давлатчилик тикланди. Миллий қадриятларимизни тиклаш, асраб-авайлаш, замонавий, янгича маънавий услублар билан бойитиш, ибратли тарихимизни пухта ўрганиш, қадимий меъморий обида ва ёдгорликларимизни кўз қорачиғидек асраш, буюк аждодларимиздан қолган маърифий меросни ўқиб-ўрганиш ва тадқиқ этиш борасида ҳам чексиз имкониятлар яратилди.
Аммо минг афсус ва надомадлар бўлсинки, бугунги кунда муқаддас ислом динимизни ниқоб қилиб олган бир талай диний ақидапараст экстремистлар тўдаси айрим ватандошларимизни, айниқса ёшларни ўзининг қора домига тортмоқда.
Бундай иллатларнинг олдини олиш мақсадида биз алдов йўлига кириб қолаётган ватандошларимиз онгида миллий бирлик, бирдамлик ва ватанпарварлик, юксак маънавиятли ва ахлоқли, эркин, масъулиятли, комил инсонийлик ғояларини шакллантиришга ҳисса қўмоғимиз лозим. Ёш авлодни ватанпарварлик, миллий ғояга содиқлик руҳида тарбиялаш, уларнинг қалбида миллий ғурур уйғотиш бугунги куннинг долзарб масаласи бўлиб келмоқда.
Халқ маънавиятини тиклашга кўмаклашувчи анъаналар ва ижтимоий тараққиёт бирлиги принципи, бир сўз билан айтганда, "Халқ манфаатлари ва Ватан туйғуси - ҳар нарсадан устун" деган ғоя тинч ва озод юртда яшовчи ватандошларимиз томонидан ҳаётга татбиқ этиб борилаётганлиги бугунги кунга келиб ўз самараларини яққол кўрсатмоқда.
Бугунги тинч, осойишта ва фаровон ҳаётнинг қадрига етиш, бу фаровонлик, осуда турмушимиз барқарорлигини таъминлаш ҳар бир фуқаронинг муқаддас бурчидир.
М.Рўзиева, Когон шаҳар ФҲДЁ бўлими мудираси
