Босиб ўтган йўлимизга назар солиб шуни ишонч билан айтишимиз мумкинки, ўтган тарихий қисқа давр мобайнида мамлакатимизда конституциявий меъёрлар ва тамойилларни ҳаётга татбиқ этиш, фуқароларнинг шахсий, сиёсий ва ижтимоий-иқтисодий ҳуқуқлари ҳамда эркинликларини тўлиқ таъминлаш, давлат бошқарувини тўғри олиб бориш борасида улкан ишлар амалга оширилди.

Жумладан бундан 23 йил олдин, яъни 1992 йил 8 декабрда Президентимиз раҳнамолигида Ўзбекистон Республикаси Олий Кенгашининг ХII-чақириқ ХI-сессиясида моҳияти ва аҳамиятини хеч нарса билан таққослаб бўлмайдиган ҳаётимизнинг қомуси бўлмиш тарихий хужжат-Конституциямиз қабул қилинди. Айнан ана шу кундан бошлаб юртимизда ҳуқуқий демократик давлат, эркин фуқаролик жамияти, бозор мунособатларига асосланган иқтисодиётни қуриш, халқимиз учун обод ва фаровон хаёт барпо этиш, халқаро майдонда ўзимизга муносиб ўрин эгаллашда Конституциямиз муносиб ўрин эгаллаб келмоқда. Шу сабабли ҳам Конституциямиз қабул қилинган кун умумхалқ байрами сифатида кенг нишолланиб келмоқда.

Зеро, Конституциямиз тарихан синалган умуминсоний, умумбашарий қадриятларни ўзида мужассам этган ҳужжатдир. Асосий қонунимиз энг ривожланган, тараққий топган давлатларнинг тарихий тажрибасига таянган ҳолда яратилган. Шунинг билан бирга Конституциямизда халқимизнинг узоқ ўтмиш даврлардан буён шаклланиб келаётган миллий тафаккури, муқаддас қадриятлари ўз аксини топган. Халқимиз кўнглида устувор бўлган адолат, ҳақиқат, иймон, олижаноблик, бағрикенглик каби улуғ хислатлар ўрин олган.

Шунингдек, Конституциямиз инсон ҳуқуқлари ва давлат суверенитети ғояларини, ўзбек давлатчилиги ривожининг тарихий тажрибасини, халқаро ҳуқуқнинг умумэтироф этилган нормаларини ўзида мужассам этган бўлиб мустақилликни мустаҳкамлашнинг, хар томонлама тараққий этган эркин фуқаролик жамияти барпо этишнинг мукаммал дастуриламалидир.

Шуни алоҳида бир ғурур билан айтишимиз мумкинки, ўтган қисқа вақт 23 йил ичида Ўзбекистон Конституцияси халқимиз қалбидан чуқур жой олди, дунё ҳамжамиятининг эътирофига сазовор бўлди.

Конституциямиз демократик жамият барпо этишнинг мукаммал ҳуқуқий базаси бўлиб республикамизда қабул қилинаётган ҳар бир ҳуқуқий ҳужжатга бош асос бўлиб хизмат қилади, чунки республикамизда қабул қилинаётган бирорта ҳам қонун ёки бошқа норматив-ҳуқуқий ҳужжат Конституция нормаларига ва қоидаларига зид келиши мумкин эмас.

Мазкур тамойилдан келиб чиқиб Конституцияда белгилнаган устувор ғояларни рўёбга чиқариш борасида қабул қилинган қонунлар ва меъёрий ҳужжатлар жамиятимизни эркинлаштириш, хўжалик юритувчи субъектлар фаолияти эркинлигини таъминлашда ва иқтисодий мустақилликни ошириш, кенг тармоқли бозор инфратузилмасини шакллантириш, тадбиркорлик фаолиятини ривожлантириш йўлидаги тўсиқларни бартараф этишда ҳал қилувчи аҳамият касб этиб келмоқда.

Конституциямиз ўзида халқнинг руҳияти, ахлоқи ва орзу-умидларини акс эттириб, халқимизнинг шукуҳий онги ва ижодкорлигининг маҳсули сифатида яратилганлиги билан қадрлидир. Қолаверса, мустақиллик йилларида қўллга киритган ютуқларимизда Конституциямизнинг аҳамияти беқиёсдир.

Мухтасар қилиб айтганда, жонажон ватанимизнинг қомуси бўлган Республикамиз Конституцияси бугунги кунимиз ва келажагимизнинг ҳуқуқий пойдеворидир. Конституциясини ўрганиш ва унга чуқур ҳурмат билан қараш хар биримизнинг юксак фуқаролик бурчимиздир.

Бунёд Азизов, Адлия вазирлиги масъул ходими