Яқинда болалар кийим-кечаклари билан савдо қилувчи дўкон олдида ёйиб қўйилган кийимчаларга ҳавас билан қараётган аёлга кўзим тушди. Уни танидим. Салима опа. Назаримда, у янги туғилган чақалоққа кийимча танлаётган эди. “Яна невара кўрган шекилли, ишқилиб буниси соғлом бўлсин”, деган ўй беихтиёр кўнглимдан ўтди. Бундан икки йил бурун Салима опа ўз тақдирини бизга ҳикоя қилиб берган эди.

Ўша куни тушлик вақти эди. Туғилганлик тўғрисида гувоҳнома олгани келган Салима опа бино бурчагида бошини хам қилиб турар, ёнидаги йигит ҳам афтодаҳол эди. Биз ажрим масаласида келишгандир, деб ўйладик.

Унинг кўзидаги мунгни кўриб, кўнглимизда аллақандай нотинчлик уйғонди. Аёлни кўп куттирмай ичкарига таклиф қилдик. Ёнидаги йигит қизининг турмуш ўртоғи экан. У туғуруқхонадан берилган маълумотномани узатди.

— Янги меҳмон муборак бўлсин, — дедим.

Салима опанинг кўзидан шашқатор ёш қуйилди. У юзини селдек юваётган кўзёшини тўхтатолмай дардини бизга тўкди:

— Ота-онамнинг ёлғиз фарзандиман. Бобо-бувим эрта оламдан ўтиб кетишган экан, ҳовли-жойлар отамга қолган. Отамнинг синглиси “қизингизни чиқарсангиз, бу уйлар бегона куёвга насиб қиладими”, дея­вериб мени болалигимдан аммамнинг ўғ­лига унаштиришди. Йиллар ўтиб турмуш қурдик. Кетма-кет фарзанд кўр­дик, аммо ҳар гал бахтимиз кемтик бўлаверди. Болаларимиз туғма ирсий касаллик сабабли, кўп яшамай вафот этишди. Умида тўртинчи фарзандим. Худога шукр, у соғлом туғилди. Тўрт йилдан ке­йин унинг укаси дунёга келди, бироқ у ногирон эди. Ўтган йили ўн етти ёшида вафот этди.

Болаларимизнинг бундай туғилиши эрим билан қариндошлигимизда эканлигини кеч англаб етгандик. Шу сабабдан, Умидани етти ёт бегона жойга узатдик.

Пешонам қурсин, аммо қизимнинг боласи ҳам нуқсонли туғилди...

Хулоса ўрнида айтиш мумкинки, яқин қариндошларнинг оила қуришлари бўлажак наслга, яъни, туғилажак фарзанд соғлигига салбий таъсир этади. Аввало, жуфт танлашда бир-бирларининг соғликлари ва қариндошликдан узоқлашиш томонларига эътибор беришлари лозим. Акс ҳолда...

Гулноза Насретдинова, Бухоро шаҳар “Никоҳ уйи” инспектори