Янгиликлар

Ёшларнинг ҳуқуқий маданиятини ошириш йўлида

Жамиятда ҳуқуқий онгни, ҳуқуқий маданиятни янада ошириш ва қонунийликни мустаҳкамлашга қаратилган ҳуқуқий билимларни аҳоли ўртасида кенг тарғиб қилинишини ташкил этиш мақсадида, Ўзбекистон Республикаси Адлия вазирлиги томонидан Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман), Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини-ўзи бошқариш органлари қўмитаси билан ҳамкорликда “Ёшларда инсон ҳуқуқлари маданиятини ошириш ва ҳуқуқий маърифат ишларини янада такомиллаштиришнинг долзарб вазифалари” мавзусида Олий ва ўрта махсус таълим вазирлиги ҳамда ҳудудлардаги олий таълим муассасаларида видеоконференция ўтказилди.

Видеоконференцияда вилоятдаги ҳуқуқни муҳофаза қилувчи ва суд органлари, ҳарбий қисм офицерлари, нодавлат нотижорат ва жамоат ташкилотлари, давлат бошқаруви органлари, шунингдек, олий ва ўрта махсус таълими муассасалари маънавий-маърифий ишлар бўйича масъул ходимлари ва профессор ўқитувчилари иштирок этдилар.

Тадбирда Ўзбекистон Республикаси Олий Мажлисининг 1997 йил 29 августдаги қарори билан тасдиқланган “Жамиятда ҳуқуқий маданиятни юксалтириш миллий дастури”га мувофиқ аҳолининг ҳуқуқий онги ва ҳуқуқий маданиятини оширишга қаратилган ҳуқуқий тарғибот ва ҳуқуқий таълим ишларини олиб бориш барча давлат органлари ва жамоат ташкилотларининг муҳим вазифаси бўлиб ҳисобланиши, бу борада аҳолига, айниқса ёшларга қабул қилинаётган қонун ва қонун ости ҳужжатлари ҳамда Давлат Дастурларининг мазмун-моҳиятини халқчил тарзда етказиш ва бу билан фуқароларимизнинг ҳуқуқий маданиятини янада ошириш, уларни огоҳликка даъват этиш, экстремизм ва терроризм иллатларини олдини олиш, шунингдек, ёшларда инсон ҳуқуқлари маданиятини ошириш юзасидан адлия органлари, Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман)нинг олдига бир қатор вазифалар қўйилганлиги таъкидлаб ўтилди.

Шунингдек, ана шу вазифаларни амалга ошириш мақсадида адлия органлари томонидан манфаатдор идоралар билан ҳамкорликда бир қатор чора-тадбирлар режаси, назорат режалари ва алоҳида йўналишлар бўйича танловлар ишлаб чиқилиб, ижрога қаратилганлиги, қилинган ишлар ҳар ой, ҳар чорак ва ҳар йилда умумлаштирилиб, таҳлил қилиб борилиши айтиб ўтилди.

Бундан ташқари, Ҳуқуқий тарғибот ва маърифат бўйича давлат органлари ишларини мувофиқлаштириш бўйича идоралараро кенгашнинг ташкил этилганига 3 йил бўлганлиги ва шу йиллар давомида кенгаш томонидан жами 1,5 млн.дан ортиқ тарғибот тадбирлари ташкил қилинганлиги, мазкур тадбирларда 26 млн.дан ортиқ аҳоли қамраб олинганлиги, аҳолининг 85 фоизини эса ёшлар ташкил қилганлиги маълумот ўрнида таъкидланди.

Шундан сўнг мунозара тарзида вилоятлар томонидан ушбу йўналишларда амалга оширилган ишлар тўғрисида ҳам маълумотлар берилди.

Видеоконференция қизғин баҳс-мунозараларга бой тарзда ўтиб, келгусида ҳам худди шундай тадбирлар ташкил қилиниши ҳақида келишиб олинди.