Янгиликлар

Мурожаатлар билан ишлаш талаблари

Ўзбекистон Республикаси Вазирлар Маҳкамасининг 2015 йил 31 мартдаги “Давлат органлари ва давлат муассасаларида жисмоний ва юридик шахсларнинг мурожаатлари билан ишлаш тартиби тўғрисидаги Намунавий низомни тасдиқлаш ҳақида”ги Қарори ижроси бўйича Бухоро вилоят адлия бошқармаси томонидан вилоят Фавқулодда вазиятлар бошқармасида “Жисмоний ва юридик шахсларнинг мурожаатлари тўғрисида”ги Ўзбекистон Республикаси қонуни ҳамда “Давлат органлари ва давлат муассасаларида жисмоний ва юридик шахсларнинг мурожаатлари билан ишлаш тартиби тўғрисидаги Намунавий низом”нинг мазмун-моҳияти юзасидан давра суҳбати ўтказилди.

Тадбирда вилоят адлия бошқармаси, вилоят ҳарбий прокуратураси, вилоят ахборот ва телекомуникациялар бошқармаси масъул ходимлари ҳамда вилоят Фавқулодда вазиятлар бошқармасининг барча ходимлари иштирок этдилар.

Тадбирда сўзга чиққанлар, “Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонуни ҳамда унга асосан қабул қилинган Ўзбекистон Республикаси Вазирлар Маҳкамасининг 2015 йил 31 мартдаги “Давлат органлари ва давлат муассасаларида жисмоний ва юридик шахсларнинг мурожаатлари билан ишлаш тартиби тўғрисидаги Намунавий низом”нинг ўзига хос хусусиятлари, мурожаатларни кўриб чиқиш билан боғлиқ муносабатлар ҳақида тўхталиб ўтдилар.

Жумладан, ушбу қонун давлат органлари ва давлат муассасаларида жисмоний ва юридик шахсларнинг мурожаатлари билан ишлаш тартиби, мурожаатларни тегишли тартибда рўйхатга олиш, уни ижрочисига ўз муддатида етказиш, мурожаатни батафсил ва холисона кўриб чиқиш, мурожаат муаллифига бу ҳақда маълум қилиш, шунингдек, мурожаатни кўриб чиқиш тугалланган деб топиш ва назоратдан олишгача бўлган жараёнларни тартибга солиши айтиб ўтилди.

Шунингдек, мурожаатларнинг турлари ҳисобланмиш ариза, таклиф, шикоят ҳамда аноним мурожаат, такрорий мурожаат ва электрон мурожаатлар каби тушунчалар мавжудлиги, мурожаатлар оғзаки ёки ёзма ёхуд электрон шаклда берилиши, жисмоний шахснинг мурожаатида жисмоний шахснинг фамилияси (исми, отасининг исми), унинг яшаш жойи тўғрисидаги маълумотлар кўрсатилган ва мурожаатнинг моҳияти баён этилган бўлиши лозимлиги, юридик шахснинг мурожаатида юридик шахснинг тўлиқ номи, унинг жойлашган ери (почта манзили) тўғрисидаги маълумотлар кўрсатилган ва мурожаатнинг моҳияти баён этилган бўлиши кераклиги тушунтириб ўтилди.

Бундан ташқари, бугунги кунда мурожаатларни кўриб чиқишда йўл қўйилаётган камчиликлар, мурожаатларни асоссиз равишда рад қилиш ҳолатлари, ёки мурожаатларни кўриб чиқишдаги талабларнинг қўпол равишда бузилиши, назоратдан олиш ваколатсиз шахслар томонидан амалга ошириб келиш ҳолатлари учраётганлиги, буларнинг барчаси қонунда белгиланган жавобгарликларни келтириб чиқиши ҳаммага уқтирилди.

Шундан сўнг, давлат органлари ва давлат ташкилотларига келиб тушган мурожаатлардан мисоллар келтирилди, шунингдек, жорий йилнинг ўтган даври мобайнида келиб тушган мурожаатлар таҳлил қилиниб, айнан қайси соҳадан кўп мурожаат келиб тушганлигига эътибор қаратилди.

Тадбир қизғин ва савол-жавобларга бой тарзда ўтди.