Янгиликлар

ДОЛЗАРБ МАВЗУЛАР МУҲОКАМАСИ

Мамлакатимизда амалга оширилаётган демократик, сиёсий ва иқтисодий ислоҳотларни янада чуқурлаштириш, жамиятда тинчлик ва ҳамжиҳатликни мустаҳкамлаш ҳамда ёш авлоднинг ҳуқуқлари, эркинликлари ва қонуний манфаатларини самарали ҳимоя қилишни таъминлаш, йигит-қизларнинг маънавий ва касбий савиясини юксалтириш, уларнинг интеллектуал ва ижодий салоҳиятини рўёбга чиқариш “Камолот” ЁИҲнинг энг асосий вазифалари ҳисобланади.

“Камолот” ЁИҲ томонидан “Ўзбекистон Республикасида 2015 йилда ёшларга оид давлат сиёсатини амалга оширишга қаратилган қўшимча чора-тадбирлар Дастури” якуни ҳамда 2016 йилдаги вазифалар юзасидан Кенгаш йиғилиши бўлиб ўтди.

Йиғилишда Дастур ижросига масъул идора ва ташкилотлар раҳбарлари, масъул ходимлари, вилоятдаги ҳуқуқни муҳофаза қилувчи ва давлат бошқаруви органлари ҳамда оммавий ахборот воситалари вакиллари иштирок этди.

Тадбирда Ўзбекистон Республикасида ёшларга оид давлат сиёсатини амалга оширишга қаратилган чора-тадбирлар Дастури ёшлар ҳуқуқ ва манфаатларини таъминлаш масалаларига оид ишларни мувофиқлаштириш ҳамда таҳлил қилиш, уларни тизимли ва самарали ташкил этиш, ёшлар масаласида ижтимоий шерикликни ривожлантиришда муҳим ҳужжат бўлаётганлиги, Дастур ижроси юзасидан “Камолот” ЁИҲ томонидан ҳамкор идора ва ташкилотлар билан биргаликда бир қатор самарали ишлар амалга оширилганлиги таъкидланди.

Жумладан, 2015 йил давомида Дастур доирасида 72 мингдан зиёд лойиҳа ва тадбирлар ўтказилиб, уларда 19,5 млн.дан ортиқ ёшлар иштирок этди.

Таъкидлаш жоизки, Дастурга мувофиқ ўтказилган ҳар бир лойиҳада иштирок этаётган ёшларнинг қамрови 2-3 баробарга ортди.

Дастурнинг ёшлар ҳуқуқий маданиятини юксалтириш, демократик давлат қуриш ва фуқаролик жамиятини ривожлантириш жараёнларида уларнинг фаоллигини ошириш йўналиши 12 банддан иборат бўлиб, 2015 йил давомида ўтказилган тадбирларда 3 млн.дан ортиқ ёшлар иштирок этди.

Умумтаълим мактаби ўқувчилари ўртасида “Ҳуқуқ билимдонлари”, академик лицей ва касб-ҳунар коллежи ўқувчилари ўртасида “Сиз қонунни биласизми?”, олий таълим муассасаси талабалари ўртасида “Тафаккур синовлари” ва “Талабалар баҳори” фестивали, Ўзбекистон Республикаси Конституциясининг 23 йиллиги муносабати билан барча ҳудудларда “Ҳуқуқий саводхонлик ойлиги” ҳамда интернет тармоғида “Парламентаризм билимдони” он-лайн танлови каби ёшларнинг ижтимоий фаоллиги ва ҳуқуқий онгини ўстиришга қаратилган лойиҳаларда 2 млн.дан ортиқ ёшлар қатнашди.

Ёш оилаларни уй-жой билан таъминлаш ва маиший шароитларини яхшилаш мақсадида 2015 йилда 111 та (4378 та хонадон) “Камолот уйлари” қурилиб, ёш оилаларга 2.072 та хонадон топширилди. Дастур доирасида ёш оилаларга 228,8 млрд. сўм миқдорда ипотека кредитлари ажратилди.

Турли ижодий танлов ва фестивал ғолибларининг маҳоратини оширишга қаратилган “Парвоз” ўқув-ижодий мактаби ташкил этилиб, 70 мингдан зиёд ёшлар иштирокида “Нима қилдик Ватан учун?” ёхуд “Биз ёшлар гиёҳвандлик ва терроризмга қаршимиз!” шиори остида ёшлар фестиваллари ташкил этилди.

Ўзбекистон Республикаси Конституциясининг 23 йиллиги муносабати билан турли соҳаларда юқори натижаларга эришиб келаётган 22 нафар фаол ва иқтидорли ёшлар “Ўзбекистон белгиси” кўкрак нишони билан тақдирланди.

Йиғилишда Ёшлар дастури ижроси юзасидан масъул бўлган идора, ташкилот ва муассасаларнинг раҳбар ва ходимлари ҳам ўз фикр-мулоҳазаларини билдириб ўтдилар.

Кенгаш йиғилишида “Ўзбекистон Республикасида 2015 йилда ёшларга оид давлат сиёсатини амалга оширишга қаратилган қўшимча чора-тадбирлар Дастури”да белгиланган тадбирлар ҳамда 2015 йил – “Кексаларни эъзозлаш йили” давлат дастури ижроси, Ҳаракат томонидан 2015 йил давомида амалга оширилган ишлар, Ҳаракатнинг 2015 йил бюджет ижроси ва 2016 йил учун бюджет лойиҳаси, вилоят Кенгашининг 2016 йилга мўлжалланган иш режаси, яна бир қатор масалалар атрофлича кўриб чиқилиб, муҳокама қилинди ва тегишли қарор қабул қилинди.