Янгиликлар
Оила, никоҳ ва саломатлик
Соғлом авлод – жамият тараққиётининг асосидир. Шу боис юртимизда мустақилликнинг илк йиллариданоқ ҳам жисмоний, ҳам маънавий баркамол авлодни тарбиялаш давлатимиз сиёсати даражасига кўтарилди. 
2016 йилнинг “Соғлом она ва бола йили” деб номланиши барча мамлакатимиз аҳолисида ўзгача хурсандчилик ҳиссини уйғотди.
Ўтган йиллар давомида “Соғлом она-соғлом бола” ғоясини ўзида мужассам этган дастур асосида кенг кўламли чора тадбирлар ишлаб чиқилиб, ҳаётга жорий этилди. Хусусан, замонавий тиббий ускуналар билан жихозланган диагностика, скрининг ва перинатал марказлари, янги туғруқхоналар барпо этиш, оналар ва болалар саломатлигини ҳимоялаш мақсадида жойларда кенг кўламли ишлар амалга оширилди.
Ромитан туман ҳокимлигида “Соғлом она ва бола йили” давлат дастури ижросига бағишланган тадбир бўлиб ўтди.
Тадбирда туман ҳокимлиги, Ромитан ва Пешку туман ФҲДЁ бўлимлари ходимлари ва бошқа манфаатдор идоралар ходимлари иштирок этдилар.
Таъкидланганидек, миллат ва мамлакат келажаги, унинг ижтимоий ва маданий салоҳияти соғлом авлодни дунёга келтирувчи оналаримиз, улардан туғиладиган маънан ва ақлан теран фарзандларимизга боғлиқдир.
Башарият онгли ҳаёт кечиришни бошлаганидан бери оила ҳар қандай кашфиёт ва ихтироларнинг илҳомчиси, жамият тараққиётининг пойдевори, насллар бардавомлигини таъминловчи асосий восита бўлиб келмоқда. Зеро, мустаҳкам оила-кучли давлат ва жамият асоси.
Мустақилликнинг ўтган йигирма беш йилида ҳукуматимиз томонидан оилани мустаҳкамлаш, оналар ва болалар саломатлигини муҳофаза этишни таъминловчи қатор фармон ва қарорлар қабул қилинди.
Ушбу қарор ижросини таъминлаш борасида туманимизда ҳам кўплаб хайрли ишлар амалга оширилмоқда. Оналар ва болаларга кўрсатилаётган тиббий ёрдам сифати яхшиланмоқда, тиббий муассасаларнинг моддий техника базаси мустаҳкамланмоқда. Соғлом турмуш тарзини тарғиб этиш мақсадида маҳаллалар, қишлоқлар, касб-ҳунар коллежлари ва муассасаларда аҳоли билан ўтказилаётган тарғибот тадбирлари яхши самара бермоқда. Туман хотин-қизлар қўмитаси, маънавият тарғибот маркази, тиббиёт бирлашмаси, ФҲДЁ бўлими ҳамда маҳалла фуқаролар йиғинлари ҳамкорлигида ўтказилаётган учрашувларда иштирокчиларга репродуктив саломатлик, никоҳ ёши, тиббий кўрикнинг аҳамияти, эрта ва қариндошлар ўртасидаги никоҳларнинг салбий оқибатлари каби мавзуларда кенг тушунчалар бериб бориляпти.
Хусусан, жорий йилнинг ўтган даври давомида Пешку туман ФҲДЁ бўлими томонидан репродуктив саломатлик, никоҳ ёши, тиббий кўрикнинг аҳамияти, эрта ва қариндошлар ўртасидаги никоҳларнинг салбий оқибатлари мавзусида 40 га яқин тарғибот тадбирлари амалга оширилди.
Хулоса ўрнида шуни таъкидлаш лозимки, оила бу жамиятнинг асосий негизидир. Она ва бола саломатлигини муҳофаза этиш, фарзандларни “никоҳ” деб аталган муқаддас тушунчага ҳурмат руҳида тарбиялаш бирламчи вазифамиздир.