Янгиликлар

СЎРАГАН ЭДИНГИЗ

САВОЛ: Мен ёлғиз онаман турмуш ўртогим вафот этган,  2 нафар фарзандим бор 5 ва 2 ёшда, ўзим 2 гуруҳ ногирониман, ўқитувчи бўлиб ишлайман. Кредит асосида давлат томонидан берилган квартирада яшайман. Ҳозирги ижтимоий аҳволим оғирлашганлиги сабабли бизга моддий ёрдам бериладими?

ЖАВОБ: Ўзбекистон Республикаси Вазирлар Маҳкамасининг 2013 йил 15 февралдаги 44-сон қарори билан тасдиқланган Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисидаги Низомга асосан фуқароларнинг ўзини ўзи бошқариш органлари томонидан 14 ёшгача болалари бўлган оилаларга нафақа - болали оилаларга нафақа деб аталади.
    Болали оилаларга нафақа ва моддий ёрдам 6 ой муддатга тайинланади.
    Болали оилаларга нафақа тайинлаш ва тўлаш тўғрисидаги қарор фуқароларнинг ўзини ўзи бошқариш органи – посёлка, қишлоқ ва овул, шунингдек шаҳарларнинг маҳаллалари фуқаролар йиғини (вакиллар йиғилиши) ёки бундай қарорларни қабул қилиш учун фуқаролар йиғини томонидан ваколат берилган Комиссия (кейинги ўринларда Комиссия деб аталади) томонидан қабул қилинади.
   Болали оилаларга нафақа ва моддий ёрдам ҳар бир оила аъзосига ўртача ойлик жами даромад миқдори жами даромад аниқланаётган давр учун белгиланган меҳнатга ҳақ тўлашнинг энг кам миқдорининг 52,7 фоизидан ортиқ бўлмаган оилаларга тайинланади.
   Болали оилаларга нафақа ва моддий ёрдам ариза берувчининг ўзини ўзи бошқариш органига мурожаат қилган ойнинг кейинги ойидан бошлаб тўланади.
   Болали оилаларга нафақа ва моддий ёрдам ариза берувчининг яшаш жойи (доимий ёки асосан яшаб турган жойи) бўйича фуқароларнинг ўзини ўзи бошқариш органи томонидан оила бошлиғи ёки бошқа муомалага лаёқатли оила аъзосининг ёзма аризаси асосида тайинланади.
    Саволга Ҳуқуқий тарғибот ва маърифат бўлими бошлиғи Б.Нишонов жавоб берди.

    УЙДА ҚОЛИНГ, ЎЗИНГИЗ ВА ЯҚИНЛАРИНГИЗ СОҒЛИҒИНИ ХАВФ ОСТИДА ҚОЛДИРМАНГ!