Янгиликлар
Ватаннинг мустаҳкам таянчлари!
Вилоят ҳокимлиги, Камолот ёшлар ижтимоий ҳаракати вилоят кенгаши ташаббуси билан вилоят прокуратураси ҳамда вилоят мудофаа ишлари бошқармаси билан ҳамкорликда “Биз ватанга қоямиз, мустаҳкам ҳимоямиз!” шиори остида ўтказилган фестиваль “Ватан ҳимоячилари куни” учун муносиб туҳфа бўлди.
Байрамни юқори савияда нишонлаш, ёшлар қалбида Ватанга муҳаббат ва садоқат ҳиссини янада ошириш, уларни Ватанимиз равнақи ва халқимиз фарвонлиги йўлида бирлаштириш, мустаҳкам иродали, аждодларимизга муносиб мард ва жасур фарзандлар бўлиб камолга етишларини тафаккурларига сингдириш мақсадида ташкил этилган мазкур фестивалда вилоятнинг чегара ҳудудларида истиқомат қилаётган фаол ёшлар вилоятдаги ҳарбий қисм аскарлари, тақдирини ватан тақдири билан боғлаган-ҳарбий хизмат чоғида ҳалок бўлганларнинг оила аъзолари ва фарзандлари, шунингдек, юртимиз тинчлиги ва осойишталиги йўлида хизмат қилган ҳарбий хизматчилар қатнашдилар.
Фестивал иштирокчилари “Сомонийлар” номидаги маданият ва истироҳат боғидаги ёдгорлик пойига гулчамбарлар қўйишди.
“Биз ватанга қоямиз, мустаҳкам ҳимоямиз!” шиори остида фестивалнинг “Аскарлар ва ёшлар” лойиҳаси ҳарбий қисмларда тантанали давом этди. Шундан сўнг ҳарбий қисмнинг маҳобатли тантаналар залида Бухоро мусиқали драмма театри ижодий жамоаси иштирокида Абдунаби Ҳамро асари асосида Ўзбекистон Халқ артисти Убайдулло Бақоев томонидан саҳналаштирилган ватанпарварликни мадҳ этувчи “Тўғон” спектакли намойиш этилди.
Вилоятнинг турли санъат ва маданият масканларида давом этган фестивалнинг “Ватан фидойиларни шарафлайди!” лойиҳаси N-сонли ҳарбий қисмда ўтказилди. Бунда ҳарбий қисмларнинг ҳамда ҳарбий йўналишда ихтисослаштирилган мактабларнинг махсус кўргазмали чиқишлари, “Ўзбек жанг санъати” спортчиларининг чиқишлари намойиш этилди. Сўнгра ўзининг фидокорона меҳнатлари, жамоат ишларида фаол иштирок этган ҳарбий хизматчиларнинг фарзандлари, юрт тинчлиги йўлида жон фидо қилган марҳум ҳарбийларнинг оила аъзолари, хизмат давомида намунали ҳулқи билан тенгдошларига ўрнак бўла олган ҳарбий қисм аскарлари ҳамкор ташкилотлар томонидан диплом ҳамда эсдалик совғалар билан тақдирландилар.